Стварай культуру:
бібліятэчныя інавацыйныя паслугі

У 2020 г. Украінская бібліятэчная асацыяцыя (ВГО Українська бібліотечна асоціація) рэалізуе міжнародны праект пад назвай «Стварай культуру: бібліятэчныя інавацыйныя паслугі», які падтрымлівае Еўрапейскі Саюз па праграме Дом Еўропы. На конкурснай аснове было адабрана 32 бібліятэкара з Украіны і Беларусі, якія прайшлі навучанне з удзелам дацкіх і ўкраінскіх трэнераў. Па выніках навучання кожны бібліятэкар-удзельнік распрацаваў і ўкараніў у сваёй бібліятэцы новую інавацыйную паслугу для развіцця крэатыўных індустрый, якія прадстаўлены на дадзеным рэсурсе.

«Аўтарская Майстэрня» (анлайн)

Дняпроўская абласная бібліятэка для моладзі імя М. Святлова адкрыла анлайнавую «Аўтарскую Майстэрню», якая пазнаёміць карыстальнікаў з мясцовымі майстрамі рукадзелля, а таксама навучыць ствараць традыцыйны ўкраінскі хэндмэйд.

«Аўтарская Майстэрня» спалучае ў сабе адразу некалькі асобных кірункаў. Сярод іх «Аўтарская лялька» (відэа майстар-класы па стварэнні лялькі-матанкі), «Петрыкаўская кветка» (відэа майстар-класы па Петрыкаўскаму роспісу), «Майстэрня Мастака» (мастацкія анлайн заняткі), «Гісторыі Майстроў» (кароткія відэа гісторыі пра майстроў Днепрапятроўшчыны) і «Мастацкая галерэя» (віртуальная галерэя-продаж аўтарскіх работ майстроў).

«Размаўляючы з жанчынамі ад 30 да 45 гадоў, я высветліла, што яны цікавяцца традыцыямі і культурай Украіны, атрымліваюць задавальненне, натхненне падчас стварэння вырабаў уласнымі рукамі. Тады і ўзнікла ідэя стварэння паслугі «Аўтарская Майстэрня», якая прадугледжвае відэа з майстар-класамі па стварэнні лялькі-матанкі», — дзеліцца бібліятэкар Наталля Спарыхіна.

Пазней для пашырэння аўдыторыі карыстальнікаў да паслугі дадалася і «Майстэрня Мастака», якая прыцягнула дзяцей ад 12 да 16 гадоў, якія імкнуцца ўдасканаліць свае навыкі малявання.

Разам з тым, па словах Наталлі, тэма Петрыкаўскага роспісу, якая зараз прадстаўлена паслугай «Петрыкаўская кветка», ужо даўно мае попыт у жаночай аўдыторыі бібліятэкі ва ўзросце ад 13-ці да 25-ці гадоў.

«Падчас тэставання прататыпа з майстрамі я даведалася, што яны не ўмеюць рэкламаваць і прадаваць свае вырабы. У мяне ўзнікла вялікае жаданне ім дапамагчы і зрабіць так, каб як мага больш людзей даведалася пра іх працу. Так у «Майстэрні» з’явіліся новыя кампаненты «Гісторыі майстроў» і «Мастацкая галерэя», — распавядае Наталля Спарыхіна.

Паслуга «Аўтарская Майстэрня» працуе пры бібліятэцы імя М. Святлова з 1 верасня 2020 г.

Вынікі праекта

Расказвае Наталля Спарыхіна:

«Пакуль паслуга дзейнічае ў інтэрактыўным рэжыме, але 5 лістапада ў межах праекта адбылося адкрыццё персанальнай выставы мастака Валянціна Назаранка, які праводзіў майстар-класы ў «Аўтарскай Майстэрні». Таму можна сказаць, што мы спалучаем розныя фарматы.

Дзякуючы выставе ў гэтым месяцы ў бібліятэку прыходзіць шмат моладзі, вучняў, сяброў і проста аматараў жывапісу. Выстава мае вялікі поспех, і ўжо ёсць людзі, якія хочуць набыць працы мастака.

Сваю паслугу мы даем бясплатна, але магчымыя і платныя, індывідуальныя майстар-класы па замове, цану якіх вызначае непасрэдна майстар. Кліенты таксама могуць набыць наборы для творчасці або аўтарскія працы.

Майстар-класы ў нас даўно карыстаюцца попытам, таму павелічэння іх папулярнасці мы пакуль не назіраем. З іншага боку, нам удалося прыцягнуць да супрацоўніцтва новых партнёраў.

Веды, што я атрымала падчас праекта, маюць велізарную каштоўнасць, таму што яны неабходныя ў нашай паўсядзённай працы і накіраваны на развіццё і рух наперад. Цяпер мы стараемся пры правядзенні мерапрыемстваў абапірацца на канкрэтныя патрэбы нашых карыстальнікаў. Робім апытанні, выкарыстоўваем таксама назіранні, стараемся зрабіць так, каб мерапрыемствы прыносілі канкрэтную карысць нашым кліентам».

picture
picture
picture

Чытай таксама